1. Зергерлік өнерінде ою-өрнек жүргізу үшін алдын ала металл, былғары , ағаш бетіне белгі салатын, былғарыдан жасалатын бұйымдарды тігетін, жіп және тарамыс өткізетін ұшы үшкір құрал. Қолөнерінде, үй тұрмысында қолданылатын инелер жуан-жіңішкелігіне, үлкен-кішілігіне қарай үш топқа бөлінеді: жуан ине, бәсең ине, жіңішке ине.

Тұрмыста ине әртүрлі жұмыс барысында жиі қолданылады, сондықтан инеге байланысты атаулар мол ұшырасады: бақа ине — ең кішкене ине, жәңжеделі ине, жөндем ине — жуан ине, инелік — ау тоқитын жіңішке ағаш ине, көземелі ине — орташа іс инесі, иінағаш — ау тоқитын ағаш ине, жуалдыз — қап, етік, тоқым тігетін ине, тебен — жуан ине, жуалдыз; сида — ағаш тебен (онымен жазы көктейді), созан — тебен; ағаштан не темірден жасалған, түйенің ауытын тігетін үлкен ине; сондай-ақ, қуыс ине, көк ине, болат ине т.б. түрлері бар.

2. Түйреуіш.