үлкен ас пен тойда, жиындарда өткізілетін дәстүрлі ойын түрі. Жамбы атуда мергендердiң өнерi мен бағы сыналады. Ойын ережесі бойынша өз бағын сынауға шыққан мерген жігіт үш-төрт құлаш ұзын сырық басына ілінген күміс жамбыны белгіленген қашықтықтан жерде тұрып немесе шауып келе жатып ат үстінен садақпен не мылтықпен атып түсіруге тиіс болған. Атып түсірілген жамбы мергендігін танытқан жеңімпазға жүлде ретінде берілген.                                                                                                                                                                              Ерте заманнан келе жатқан ойында қазақ жігіттері өздерінің мергендіктерін, шеберліктерін танытып, тіпті, шауып келе жатқан аттың үстінен жамбыға садақ оғын дәл тигізген.                  Бұл ойын түрі әлем халықтарының барлығына ежелден мәлім. С.П. Толстов жамбыға садақ оғын дәл тигізген мергенді бір күнге патша ету салтының болғандығын айтады. Көптеген халықтардың үйлену дәстүрлерінде ойын барысында магиялық наным-сенім бойынша кесір рухтарды қорқыту мақсатымен оқ ататын керемет мерген жауынгерлер болған. Жамбы ататын мергендер аттарының жалын кедергі келтірмеуі үшін қырқып тастаған деген де дерек бар.                                                                                                                                              Жамбы ату ойыны ер азаматтың жауынгерлік машығы мен ептілігін, әскери дайындығын байқаудың аса тиімді сынағы іспеттес болды.