Rh–фактор адам эритроциттері мен макака–резус эритроциттерінде болатын антиген. Оны 1940 ж. макака–резус эритроциттерімен иммунизацияланған жануарлардың қан сарысуында К.Ландштейнер анықтаған болатын (атау осыдан пайда болды). Химиялық табиғаты жағынан – липопротеид. Тұқым қуалайды, өмір бойы өзгермейді. Еуропоидтарда Резус – фактордың кездесу жиілігі – 85%, монғолоидтарда – 99%. Резус – фактордың болуы не болмауына байланысты резус–теріс жəне резус – оң организмдерді ажыратады. Резус–терістерге резус–оң қанның құйылуы немесе резус–конфликті жүктілік кезінде (анасы – резус–теріс, баласы – резус–оң) қиыншылықтар тууы мүмкін (гемотрансфузионды шок, нəрестелердің гемолитикалық ауруы т.б.), бұл Резус–факторға қарсы антиденелердің түзілуімен байланысты. Резус–фактор – резус жүйесінің негізгі антигендерінің бірі, бұл жүйеге тағы 5 антиген кіреді. Барлық антигендердің түзілуі 2-хромосомаларда орналасқан 3 жұп аллельді гендердің бақылауында болады. Эритроциттерде олар əртүрлі үйлесімділікпен тіркесуі мүмкін (27 фенотип).