Қазіргі қазақ тілі синтаксисінде сөйлемнің мұндай түрлерін айтылу мақсатына қарай немесе интонациясына қарай, не модальділігіне қарай түрлері деп таниды. А. Байтұрсынұлы сөйлемнің мұндай түрлерінің төртеуін көрсетеді. Олар: сұраулы сөйлем, лепті сөйлем, тілекті сөйлем, жай сөйлем. Сұраулы жəне лепті сөйлемдердің сипаттамасы қазіргі қазақ тілі синтаксисіндегідей. Ал «жай сөйлем» деп атаған сөйлемі – қазіргі терминологиядағы «хабарлы сөйлемнің» баламасы. Мұндағы «тілекті сөйлем» қазіргі синтаксисте бұйрықты сөйлем деп қаралып жүр. Байтұрсынұлының «тілекті сөйлем» деп атауында мағыналық-функционалдық ұстаным бар, яғни іс-əрекетке деген интенцияны тұғыр етіп барып, функционалдық мағына жағынан бұйрық түрдегі, өтініш түрдегі, үгіт (ақыл) түрдегі, жай тілек (мұрат) түрдегі мəн білдіретін сөйлемдерді осы қатарға енгізеді.