А.Байтұрсынұлы «Сөз – дыбыстың мағыналы болып тізілгені. Сөз айту – дыбысты ауызбен тізу. Сөз жазу – дыбыстардың белгісін қағаз бетіне тізу» деп, сөздің айтылатынын жəне жазылатынын көрсетеді. Басқаша айтқанда сөз – дыбыстардың мағыналы тіркесі. Дыбыстардың мағыналы тіркесі ғана сөз болады. Байтұрсынұлы буын түрлерін былай деп анықтайды: буыншы əріп басқалардың ортасында қамауда тұрса, ол буынға «бітеу» деп ат қойыңдар; буын аяғы буыншы əріпке тірелсе, ол буынға «ашық» деп ат қойыңдар; буын буыншыдан басқа əріпке тірелсе, ол буынға «тұйық» деп ат қойыңдар. Бүгінгі буын түрлерінің анықтамасы Байтұрсынұлынан басталған. Байтұрсынұлының буыншы деп отырғаны дауысты дыбыс, яғни буынқұрауыш дыбыс: дауыссыздан басталып дауыссызға бітсе бітеу буын, дауыссыздан басталып дауыстыға бітсе ашық буын, дауыстыдан басталып дауыссызға бітсе тұйық буын болып шығады деп, бүгінгі буын анықтамалары Байтұрсынұлын қайталап отыр.