арнайы жинастырылып, буылып-түйілген үй бұйымдары. Жүк көбінесе, көш-қонға байланысты жасақталынады. Үйдегі көрпе-жастық, кілем, сырмақ, текемет, алаша сондай-ақ жағлан, әбдіре, абажа, кебеже, сандық сияқты жиналып қойған үй бұйымдарын да жүк деп атаған. Көшпелі үй тұрмысында киіз үйдің ішкі жиһаздары мен бұйымдарының орналасуының өзіндік қалыптасқан реті болды.                                                                                                                                                                                                                                                                              Соның ішінде үй иесінің тұтынатын бұйымдары төрдің сол жақ бөлігіне жиналса, ал басқа көрпе-жастық бұйымдары төрдің оң жағына жиналған. Әсіресе, күнделікті қолданыстағы көрпе-жастықты жинаудың да орны ерекше болған. Себебі ұқыпты дұрыс жиналған жүк ұзақ уақыт жақсы сақталады және көзге тартымды, жинақы көрінеді. Көшпелі үй тұрмысында жүктер көбінесе жүкаяқ, жүксандық, төсек ағаштың үстіне жиналады.                                                                                                                                                                                                  Жүк жинағанда астына кілем, текемет, сырмақтар салынып, үстіне көрпе-жастықтар жинастырылады. Жиналған жүктің бетіне кестелеп безендірілген жүкжапқыш жабылып, үстіне жастықтар қойылған. Сонымен бірге жүк жиналатын сандықтың бетіне сандық қап тiгiлген. Жиналған жүкті ерекше қадірлеп, балаларға «жүкке шықпа, жүктей басыласың» деп тыйым салған.                                                                                                                                                                                                                                                                                                      Көшіп-қонған кезде көлікке тиейтін, түйеге артатын тоғанақ, қанар, сандық, қаптарға салынып буылыптүйілген мүліктерді де жүк деп атайды. Сонымен бірге көште алып жүруі үшін керегені керегеқапқа, уықты уыққапқа салып буады.