з а т. 1. Белгілі бір жұмысты атқару нәтижесінде түсетін ақша, материалдық игіліктер; кіріс, пайда. Келген соң, “босқа жүргенше, тіл үйрен” деп, бір учитель қатынды жалдап, төрт ай оқытты. Бұрын қазақ баласын оқытып, ысылған, кәрі қатын екен. Баласы жоқ. Т а б ы с ы м е н күн көреді. Сол қатыннан оқығаным көп пайда болды (Ж.Аймауытов, Шығ.). Жеңгесіне тапқан т а б ы с ы н апарып берді (С.Жүнісов, Жапанда.). 2. э к о н. Кәсіпорындардың (фирмалардың, компаниялардың) белгілі бір уақыт кезеңіндегі қызметінің нәтижесінде (мыс., өнімді өткізуден, жұмыстарды орындаудан, қызмет көрсетуден) алатын ақшалай қаражаты немесе материалдық құндылықтары. Т а б ы с халықтың (жеке адамның, отбасының т.б.) өз мұқтаждарын қанағаттандыру үшін алатын ақшалай немесе заттай нысандағы қаражаты да болуы мүмкін (халық табысы) (Қаз. тілі термин. Экономика.). 3. э к о н. Өткізілген өнім мен көрсетілген қызметтің құны мен жұмсалатын шығынның арасындағы айырма ретінде алынатын өндірістік-шаруашылық қызметтің нәтижесі. Жеке адамның табысы халықтың қолына түседі және тұтыну мен қорлану мақсатына пайдаланылады. Ол жалдамалы еңбектен, кәсіпкерліктен, меншіктен, өзіндік қосалқы шаруашылықтан, қолөнерінен және басқа өзіндік кәсіппен айналысуынан түскен т а б ы с т а н құралады (ҚҰЭ). Т а б ы с т ы шаруашылық жүргізуші субъект (кәсіпорын, бірлестік, идара, т.б.) қызметінің қорытындылаушы көрсеткіші ретінде пайдалану кезінде оны материалдық шығынды, өндіріс барысында тұтынылған құрал-жабдық пен еңбек заттарының көшірілген құнын есепке алмай (шегеріп) есептейді (Қаз. тілі термин. Экономика.). 4. э к о н. Иеленушілерге төленетін дивиденд немесе бағалы қағаздың ағымдағы бағасынан алынатын пайыз, сол сияқты салым мен депозит бойынша пайыз. Негізгі қызметтен алынатын т а б ы с – субъектінің жарғылық қызметінен: өнімді дайындау мен сатудан, жұмыстарды орындаудан, қызмет көрсетуден алынатын ақшалай және басқа қаражат (Қаз. тілі термин. Экономика.). Негізгі қызметке жатпайтын қызметтен алынатын т а б ы с – негізгі қызмет барысында табыс әкелмейтін көздерден алынатын, негізгі құрал-жабдықтың, бейматериалдық активтердің істен шығуынан, тауар-материалдық құндылықтарды қосымша бағалаудан, активтерді қайта бағалаудан түсетін табысты, мүліктік табысты т.б. қамтитын табыс (Қаз. тілі термин. Экономика.). 5. а у ы с. Қол жеткен жетістік, жеңіс. Әдебиет, мәдениет салаларында бұрын болып көрмеген ғажайып т а б ы с т а р ғ а қол жетті (С.Мәуленов, Жұлдыз.).