зат. 1. Ықтияр, ырық, билік. Әйелде е р і к бар ма? Кім азғырса Соған құл. Қарлығаштан әзер болса, Шабардың екі-ақ қарасы артық шығар... Соған кетті көрермін біраз тұрса! (Ж.Аймауытов, Шығ.). Біріне күш, біріне көрік берді, Көрікке құмар етіп е р і к берді, Атадан сол сияқты мирас қалды, Аяймын күшім жетсе енді немді (Шал ақын, Өлеңд.). Ере бердім мен артынан бір есер, Қарсы келіп е р к і м бар ма тіресер? Жел айдаған тұрағы жоқ қаңбақтай, Ағынымды дедім-дағы сай кесер (М.Дулатов, Шығ.). 2. Бостандық, теңдік, еріктілік. Е р і к -десе жүрек тулап, Қандай әйел қызбайтын (Б.Майлин, Шығ.). Бұл маған е р і к пен теңдік беретін дүние емес, ақша мен мал дүниесі (Ж.Саин, Жол үсті.). 3. п с и х. Адамның бойындағы психологиялық сезім, жігер, қайрат. Балалар сіздің сөзіңізден өзіңіздің е р к і ң і з д і, сіздің мәдениетіңізді сезе алатындай болуы керек (Қ.Жарықбаев, Психология). Е р і к -адамның өз қызметін және әртүрлі психикалық процестерді өзі детерминациялауынан және өз реттеуінен көрінетін қабілеті (Қаз. тілі термин. Психология.). Е р і к – адамның өз мінез-құлқын саналы түрде меңгере алу қабілеті, оның белгілі бір мақсатқа жету, іс-әрекетті орындап шығу жолында қиыншылықтарды белсенділікпен жеңе білуінен байқалатын ішкі қуаты (ҚҰЭ). 4. ауыс. Кеңшілік, мұрсатана. Ойланып шешулеріңе он күн е р і к беремін (Қаз. ертег.).