(Біріккен Ұлттар Ұйымы) – Екінші дүниежүзілік соғыстан кейін антигитлерлік коалицияға мүше мемлекеттер – КСРО, Қытай, АҚШ, Ұлыбритания, Францияның бастамасымен құрылған. Ұлттар Лигасының мұрагер ұйымы. БҰҰ – әмбебап халықаралық ұйым. Мақсаты – халықаралық бейбітшілік пен қауіпсіздікті қолдау, нығайту, теңдік және халықтардың өзінің мемлекеттік құрылысын өзі шешетін қағидаттарына негізделген мемлекеттер арасындағы ынтымақтастықты дамыту. БҰҰ-ның бас органдары: Бас Ассамблея, Қауіпсіздік кеңесі, Экономикалық және әлеуметтік кеңес, Қамқорлыққа алу жөніндегі кеңес, Халықаралық сот пен Хатшылық. Штаб-пәтері Нью-Йоркте (АҚШ) орналасқан. БҰҰ-ның ресми тілдері ағылшын, француз, орыс, испан, қытай және араб тілдері болып саналады. БҰҰ-ға 185 мемлекет мүше. БҰҰ жүйесіне іс-әрекеті Жердегі адамдардың тіршілігін жақсартуға бағытталған 30-дан астам ұйымдар кіреді. Қызметі: баланы өсіру мен дамыту; қоршаған ортаны қорғау; адам құқығы; денсаулық сақтау және медициналық зерттеу; кедейшілік ауқымын азайту және экономикалық даму; ауылшаруашылығы мен балықшаруашылығын дамыту; білім беру; әйелдердің жағдайын жақсарту; дүлей зілзалалар кезінде көмек көрсету; әуе және теңіз жолаушыларын тасымалдау; атом энергиясын бейбіт мақсатта пайдалану; еңбекті және еңбекшілердің құқығын қорғау және т.с.с.