Сұраныс бойынша 14 нәтиже табылды

  • ЖАРАПАЗАН

    lat: JARAPAZAN

    (ар. иа рамадан (о, рамазан) يارمضان – рамазан айында ел аралап, діни өлең айтып садақа жинау дәстүрі.

    Көп сөйлемей жүре бер, сөзің құрсын, Саулатып жарапазан нағып тұрсың? («Қисса хазірет Әлидің Сараң байды жолға салғаны». Бабалар сөзі. 16-том. 2005. 100 томдық).

    Дереккөз: Г. Мамырбекова. Қазақ тіліндегі араб, парсы сөздерінің түсіндірме сөздігі. – Алматы. 2017. 658 б.

  • Жарапазан

    lat: Jarapazan

    зат есім. 1. діни. Ораза айында ауыл аралап, сый-сияпат, садақалар жинап жүріп айтатын салт өлеңі; тұрмыс-салт жырларының дінге байланысты түрі.

    Жарапазан «рамазан» деген сөзден шыққан. Ораза уақытында балалар, бозбалалар түнде үйдің тұсында тұрып, жарапазан өлеңін айтады (А.Байтұрсынов, Шығ.). Жарапазанның негізгі мақсаты – ораза айында ел көңілін көтере жүріп, ислам дінін насихаттау, жұртты шариғатқа, иманға ұйыту, береке-бірлікке, ізгілікке шақырудан туған. Қазақтың өткен кезде дін салтына байланысты туған шығармаларының бірі – жарапазан өлеңдері деп аталады (М.Ғабдуллин, Қаз. ауыз әдеб.). Жас шәкірт балалар тілімен айта жөнелген жарапазан естілді (М.Әуезов, Абай). 2. ауыспалы мағына. Мыжыма, бос сөз, құр сарнаушылық. Ланке оның сөзін аяқтатпай, кеңк-кеңк күлді. – Сол баяғы жарапазан (Қ.Жұмаділов, Соңғы көш). Білемін, сен Жезтырнақтың үйреткен жарапазанын соғып тұрсың (А.Мекебаев, Жезтырнақ). Осымен айтыс сөзін аяқтайық, Ұзақ сөз мәні болмас жарапазан (Айтыс). – Содан бері қақсап келе жатқан жарапазандарың осы ғой? (Ж.Аймауытов, Шығ.).

    Дереккөз: Қазақ әдеби тілінің сөздігі. Он бес томдық. 6 - том / Құраст.: Ж. Қоңыратбаева, Ғ.Қалиев, Қ.Есенова және т.б. - Алматы, 2011. - 752 б.

  • Жарапазан

    lat: Jarapazan

    ораза айында түнде ауыл аралап, садақа жинағанда айтатын салт өлең.

    Дереккөз: Журналист Тоқан Бодаухан ұсынған сөздер

  • ЖАРАПАЗАН

    lat: JARAPAZAN

    А.Байтұрсынұлы «Əдебиет танытқыш» еңбегінде қолданған термин. Жарапазан - қазақ даласында ислам діні берік орын тепкеннен кейін пайда болған тұрмыс-салт жырларының бір түрі. Автор жарапазан рамазан деген сөзден шыққанын, ораза уақытында балалар, бозбалалар түнде үйдің сыртында тұрып жарапазан айтатынын, ораза ұстаған адамдар сауап алу үшін жарапазан айт қандарға құрт, май, ірімшік, т.б. беріп, риза етіп жіберетін болғанын сөз етеді. Сондай-ақ жарапазанды кəсіп етіп, ораза уақытында ел аралап, күндіз жүріп айтатын үлкен адамдар болғанын айтады. Жарапазанды екі адам болып айтқан. Бірі жарапазан айтқанда, екіншісі оның қостаушысы болған.

    Дереккөз: Ахмет Байтұрсынұлы. Энциклопедия / бас ред. Тойбаева Ж. - Алматы: Қазақ энциклопедиясы, 2017. - 744 б.

  • Жарапазан айтты

    lat: Jarapazan aıtty

    а) Ораза айында ауыл аралап, жарапазан әндерін шырқады.

    Балалар жарапазанайтып келеді (Ауызекі). ә) Ауыз жаппады, қақсады. Басында әркім өз үйін салсын деп жарапазанайтқан сіз емес пе едіңіз? (Ш.Хұсайынов, Таныс адам.). Кеңседен кеңсе қоймай қырық қайтара кіріп, жарапазан айтып шықпасаң, бүгінде іс бітпейді (Ә.Кекілбаев, Құс қанаты).

    Дереккөз: Қазақ әдеби тілінің сөздігі. Он бес томдық. 6 - том / Құраст.: Ж. Қоңыратбаева, Ғ.Қалиев, Қ.Есенова және т.б. - Алматы, 2011. - 752 б.

  • Жарапазан айту

    lat: Jarapazan aıtý

    Ораза айында ауызашар кезінде ауыл аралап жарапазан жырын айту.

    Тарауық, жарапазан айту дегендер осы күнде сирек ұшырайды (А.Құрманғалиев, Ислам діні.).

    Дереккөз: Қазақ әдеби тілінің сөздігі. Он бес томдық. 6 - том / Құраст.: Ж. Қоңыратбаева, Ғ.Қалиев, Қ.Есенова және т.б. - Алматы, 2011. - 752 б.

Ұқсас сөздер
Көп ізделген сөздер
  1. ЖҮКТЕУ
  2. АҚПАН
  3. ИТ АРҚАСЫ ҚИЯН
  4. КОММУНИКАЦИЯ ТЕОРИЯСЫ
  5. ЕМТИҚАН
  6. ЖАРАПАЗАН
  7. АҚПАРАТ
  8. ҚАР
  9. АППЛИКАЦИЯ
  10. ORАMАL
Базада барлығы 330 165 сөз.
Өңделген сөздердің саны: 157 960